Гадаадын өндөр хөгжилтэй улс орнуудад шоколадаар хийсэн урлагын гайхалтай бүтээл, хүний дүрст баримлуудын үзэсгэлэн сүр дуулиантайгаар зохион байгуулагддаг. Мөн бялуу, шоколад, зайрмаг урлалын тэмцээн хүртэл болдог уламжлалтай.

Манай улсад энэ төрлийн үзэсгэлэн зохион байгуулагдах нь байтугай шоколадыг зөвхөн амттан болгон идэхээс өөрөөр төдийлөн ашигладаггүй, баримал, бүтээл хийж тусгайлсан үзэсгэлэн дэлгэж байсан тохиолдол ч байдаггүй. Шоколадыг өөрөөр хэрхэн ашиглаж болох, хүн бүрийн дуртай амттан өнөөдөр ямар түвшинд хүртэл хөгжиж байгааг таниулан мэдүүлэх зорилготой нэгэн залуугийн тухай сурвалжлага бэлтгэлээ.

 

-БҮТЭЭЛҮҮДЭЭ УРЛАХДАА 300 КГ ШОКОЛАД АШИГЛАЖЭЭ-

Н.Зөнбилэг шоколадан материал ашиглан бүтээл урлал хийх оролдлогоо гурван жилийн өмнөөс хийж эхэлжээ. Тэрээр тогооч хүн юу хийж чаддагийг бусдад харуулахын зэрэгцээ нийгэмд бага ч гэсэн гэрэл гэгээтэй, эерэг зүйл байдаг юм шүү гэдгийг мэдрүүлэхийг хүссэн тухайгаа бидэнтэй хуваалцсан юм. Шоколадаар урласан бүтээлээрээ анх удаа үзэсгэлэн гаргах гэж байгаагаас гадна Монголд энэ төрлийн бүтээлийг мөн анх дэлгэж байгаагаараа онцлогтой юм байна.

Үзэсгэлэнд шоколадаар зурсан зураг, шоколадаар хийсэн баримал бүтээлүүд тавигдах аж. Бүтээлүүдээ урлахдаа гурван сар хагасын хугацаанд нийт 300 кг шоколад зарцуулжээ. Түүнчлэн дан хүнсэнд хэрэглэж болох түүхий эд материалыг нэмэлт чимэглэлээр ашигласан байна.

Энэ тухай тэрээр “Гурван сар гэдэг богинохон хугацаа боловч хүнсний бүтээгдэхүүнийг муутгахгүй хийх гэдэг утгаараа асар урт хугацаа юм. Нэг, хоёр жил хадгалах ямар ч боломж байдаггүй. Шоколадан урлал олон улсад маш хурдацтайгаар хөгжиж байна. Дан ганц шоколадан урлалын бүтээлүүдээ дэлгээд зогсохгүй өдөр тутмын хэрэглээ болтол хөгжсөн шоколадны соёл, түүхийг таниулж, олон талын мэдээлэл өгнө. Тухайлбал, өдөр тутмын хэрэглээ болсон богино долгионы зуух шоколадаас болж бий болсон гэдгийг хүмүүс төдийлөн мэддэггүй байх” гэлээ.

Шоколадаар баримал бүтээж, зураг зурах нь түүхий эдийн хувьд хэтэрхий үнэтэй байдаг аж. Иймд үндэсний үйлдвэрлэгчид түүнд итгэл хүлээлгэн дэмжиж, үйлдвэрлэдэг шоколадаа өгч бүтээл урлахад гүн туслалцаа үзүүлсэн байна. Шоколадаар гурван жилийн турш урлахдаа чонын толгой болон янз бүрийн амьтны баримал, олон янзын зураг зурдаг байжээ. Хүнсний бүтээгдэхүүн гэдэг утгаараа удаан хадгалах бололцоо байдаггүй учир удалгүй хайлуулдаг байна.

 

 

-15 НАСТАЙГААСАА ТОГООЧООР АЖИЛЛАЖ ЭХЭЛЖЭЭ-

Түүний хувьд мэргэжлийн уран барималч, зураач хүн биш. Тогооч мэргэжлээр зургаан жил ажилласан, 21 настай залуу. Анх арван жилийн сурагч байхдаа буюу 15 настайдаа хичээлийнхээ хажуугаар “Үндэсний соёл амралтын хүрээлэн”-д тогоочоор цагийн ажил хийж эхэлжээ. Энэ үеэс л тогооч хүн гэж хэн бэ, ямар байх ёстой зэргээр бүхнийг таньж мэдэж, энэ мэргэжлийг өөртөө нээжээ.

Хүсэл мөрөөдлөө дагаад “Хүнсний технологич, талх нарийн боов”-ны чиглэлээр суралцаж төгссөн байна. Сургуулиа төгсөөд “Shangri-La”, “Улаанбаатар” зочид буудалд тогоочоор ажилласан гэдэг. Тэрээр хэлэхдээ “Тогооч хүн үйлчлүүлэгчиддээ сайнаар үнэлэгдэх явдал чухал. Тогооч хүний хийсэн хоолыг хамгийн эцсийн дүндээ үйлчлүүлэгч үнэлэх нь хамгийн үнэн юм. Үйлчлүүлэгч хоолыг амтархан идэх нь хамгийн гоё мэдрэмж. Тогооч хүн нэг өдрийн өмнө бүх зүйлээ төлөвлөж, нэг өдрийн өмнө бэлтгэгдсэн байх ёстой” хэмээсэн юм.

Одоо “Cielo food N bar”-ийн ахлах тогоочоор ажиллаж буй тэрээр тогоочоор ажилласан жилүүдийнхээ туршлагаар өөрийнхөө юу хийж чаддагийг сорьж байгаа аж. Мөн энэхүү үзэсгэлэнгээсээ бага зэрэг эмээх мэдрэмж төрж, хүмүүс хэрхэн хүлээж авах бол гэсэн хүлээлттэй байгаагаа нуусангүй. Н.Зөнбилэг бидний яриа ийн үргэлжиллээ.

 

-ЭНЭ САРЫН 30-НД “MN ART GALLERY”-Д ШОКОЛАДНЫ
ҮЗЭСГЭЛЭНГИЙН НЭЭЛТ БОЛНО-

-Шоколадаар бүтээл урлахад ямар бэрхшээл тулгардаг вэ?

-Шоколадаар бүтээл хийнэ гэдэг амаргүй. Шингэн, хатуу биетэд амархан хувирч баримал хийхэд зориулагдсан материал биш болохоор хүндрэлтэй тохиолдол бишгүй гардаг.

-Урлахдаа ямар багаж ашигладаг вэ?

-Хатуу мод, төмөр, баримал биш учраас чухал багаж зэвсэг ашиглагддаггүй. Дандаа л гал тогооны багаж, тоног төхөөрөмж, хэрэгслүүд ашиглана даа.

-Үзэсгэлэнд дэлгэх бүтээлүүдийнхээ хичнээнийг урлаж амжив. Бэлтгэл ажил хэдэн хувьтай явагдаж байна вэ?

-Бүтээлүүдийн гүйцэтгэл 90 хувьтай явагдаж байна. Одоо хүлээгдэж байгаа хамгийн том асуудал тээвэрлэлтийн ажил. Энэ хамгийн чухал нь. Эвдэж гэмтээхгүйгээр галерейд аваачих л хэцүү байна. Бүтээлүүдээ аваачсаны дараа галерей хэдэн градусын дулаантай байх вэ, орчин температур мөн чухал байна. Бүтээлүүдээ дэлгэх явцад хэрхэн хадгалагдах нь бас чухал байна. “MN art gallery”-д энэ сарын 30-нд нээлтээ хийнэ. Үзэсгэлэнг сонирхох хүсэлтэй хүмүүс 12-р сарын 1-нээс 6-ны өдрүүдэд үнэ төлбөргүйгээр үзэж сонирхох боломжтой. Шоколад иддэггүй, дургүй хүн гэж тун ховор. Шоколад иддэг, сонирхдог бүх насны хүнийг тэнд ирээсэй гэж урьж байна.

-Нэрлэж хэлэх хамгийн содон бүтээл тань аль нь вэ?

-Бүгд л их, бага хэмжээгээр хөдөлмөр шингэсэн болохоор энэ, тэр гэж ялгаж хэлэх хэцүү. Хамгийн гол нь бүтээлийг минь үзэж байгаа үзэгч буюу хүмүүст ямар мэдрэмж төрүүлэх нь чухал. Хүн бүрт харилцан адилгүй, өөр өөр мэдрэмж төрүүлэх байх аа. Хэн яаж ч хүлээж авч магадгүй юм.

П.УРНАА

ГЭРЭД ЗУРГИЙГ: Г.ТҮШИГ

Эх сурвалж: medee.mn