Хүүхдүүдийн дуртай хүүхэлдэйн баатруудаар машинаа дүүргэж, тууз чимэглэлээр машинаа гоён, дугаар дээрээ “Аав боллоо” гэсэн бичиг наасан нэгэн залуугийн зураг өмнөх долоо хоногт сошиалд хүчтэй давалгаа үүсгэсэн.

Нийгэмд эерэг хандлага түгээж эхнэрээ төрөхийн гадаа хүлээж зогссон энэ залууг М.Сэрдамба гэдэг. “Нарантуул” олон улсын худалдааны төвд ажилладаг. Хүсэн хүлээсэн хүүгээ тэврэн авсан шинэхэн аав.

Харин түүний эхнэрийг Э.Наранбулаг гэдэг. Тэрбээр эхнэрээ төрөхийн ямар их өвдөлтийг давж, ямар их тэвчээр, зориг гаргаж байгааг сэтгэлдээ төсөөлөн, зүрхээрээ мэдрэн, хорвоод мэндлэх үрээ болон эхнэрээ баярлуулахыг маш ихээр хүсч машинаа чимэглэн угтан авсан нь олны анхаарлыг ихэд татсан юм.

Гэхдээ Э.Наранбулаг нөхрийнхөө гэнэтийн бэлгийг түрүүлээд мэдчихсэн байжээ. Учир нь эмнэлэгт хамт байсан ээжүүд гадаа “Ямар мундаг, эхнэртээ ямар их хайртай залуу вэ. Эхнэр нь ямар азтай юм бэ” гэх мэтээр ярьж байсныг сонсоод харахад нөхөр нь зогсож байсан гэнэ. Тухайн үедээ нөхрөө эмнэлгийн гадна өөрийг нь баярлуулах гээд хүйтэнд машинаа чимэглээд зогсож байна гэж төсөөлөөгүй аж. Хэдийгээр нөхрийнхөө гэнэтийн бэлгийг түрүүлээд мэдсэн ч нөхрийнхөө тэр сэтгэлд дэндүү их баярлаж, дэндүү их аз жаргалыг мэдэрсэнээ ярьж байлаа.

Хоёулаа эмнэлэгт ирээд гурвуулаа болоод буцаж байгаа тэдэнд зөрсөн хүн болгон баяр хүргэж, уриалгахан зам тавьж өгч, замын цагдаа хүртэл хүндэтгэлээ илэрхийлж байх тэр мөч, олны анхааралд орж байгаа нь ичмээр ч, эцэг, эх болох сайхныг мэдэрч, аз жаргалдаа умбан яаж гэртээ харьснаа ч мэдээгүй гэдэг.

Гэтэл М.Сэрдамбын гэнэтийн бэлэг үүгээр дуусаагүй байж. Тэрбээр гэртээ орж ирэхэд хаалганаасаа эхлээд шаар, гэрлээр гэрээ чимж, “Wellcome to my son” хэмээн бичиг өлгөн угтан авчээ. Яг энэ л мөчид Э.Наранбулаг хорвоогийн хамгийн жаргалтай ээж, хань болж өөрийн эрхгүй баярын нулимс унагасан байна. Үнэхээр л ханилсан ханиасаа хайр, халамж, талархлыг мэдэрнэ гэдэг бүсгүйчүүдийн хувьд үгээр зүйрлэшгүй аз жаргал билээ. Э.Наранбулагт ч “Баярлалаа” гэхээс өөр хэлэх үг юу ч олдоогүй гэнэ. Өөрийгөө хамгийн азтай эмэгтэй гэж тодорхойлж надад энэ хүнийг өгсөн хувь тавиландаа баярласан хэмээж байлаа. Хань М.Сэрдамба нь цаг ямагт гайхалтай хань, сайн аав болохоо үргэлж мэдрүүлж байдаг хамгийн шилдэг эр хүн.

М.Сэрдамба, Э.Наранбулаг нар бусад хосуудын л адил нэг нэгнээ олж үерхэж, нөхөрлөж, дурлаж, хайрлаж, дасаж, эхнэр, нөхөр, аав, ээж болж байгаа. Гэвч тэд энэ бүхэнд хүрэх гэж багагүй зовлон бэрхшээл, хүнд шалгууруудыг туулсан гэдэг.

Хамгийн хайртай хүн нь онош нь тодорхойгүй өвчнөөр эмнэлгийн орон дээр ухаангүй хэвтэх мөчид түүнийхээ төлөө юу хийх хэрэгтэйгээ ч мэдэхгүй үед үнэхээр л тэнгэр хол газар хатуу санагдаж, бурханаас үүрд хамт байлгаж өгөхийг мянга, түмэнтээ удаа гуйж байсан гэдгээ Э.Наранбулаг ярьж байв. Гэхдээ хамтдаа л байвал бүх зүйл сайн, сайхан болно гэсэн итгэлээр түүнийгээ өдөр бүр сахиж, асарч байж. Харин удалгүй М.Сэрдамбын бие сайжирч хөл дээрээ босох үед Э.Наранбулаг мөнгө олж, хайртай хүнээ эрүүл болгохоор шийдэн Солонгос улсад ажиллахаар явжээ.

Харин түүнийг эзгүйд М.Сэрдамба хоёр ч удаа сэхээн амьдруулах эмчилгээнд орсон байна.

Хэдийгээр нөхрөө Монголд ухаангүй байгаа мэдээг сонсоод гүйгээд очмоор байсан ч их мөнгө хурааж нөхрөө эрүүл болгох зорилгоо биелүүлэхийн тулд нулимс дуслуулан ажлаа хийж байсан гэдэг.

Азаар М.Сэрдамбын биеийн байдал сайжирч, Э.Наранбулаг ч эх орондоо ирж, одоо бяцхан хүүгийн аав, ээж болоод байна.

М.Сэрдамба, Э.Наранбулаг нарт ирээдүйд төлөвлөсөн зүйл их бий. Хамгийн том мөрөөдөл нь биелж хүүтэй болсон тэд хуримаа хийж, хайраа бататган гэр бүлээ батлуулж, гал голомтоо бадраахыг хүсч байгаа аж.

Мэдээж насаараа Нарантуул зах дээр ажиллана гэж төлөвлөөгүй. Гадаадад сурч, мэргэжилтэй болж, мэргэжлээрээ Монголдоо ажиллаж, өөрсдийн хөдөлмөрөөрөө өөрийн гэсэн орон сууцтай болохыг хүсдэг. Мэдээж энэ хугацаанд бурхан дахиад бэлэг илгээвэл түүнийг нь хэд ч байсан хамаагүй тосон авч, өнөр өтгөн гэр бүлтэй болно хэмээж байлаа.

Тэд бол хайрын хүчээр олон саад давааг даван туулж, сайн сайхан бүхэн рүү хамтдаа тэмүүлж яваа олон хосын жишээ.

Х.Соёл-Эрдэнэ