Loading…

Say.mn

-ДУЛААНЫ СТАНЦУУД ХАМГИЙН ИХ АЧААЛЛЫГ ҮҮРЧ, ХАМГИЙН БАГА ҮНЭЭР
ЭРЧИМ ХҮЧ БОРЛУУЛДАГ

Монгол Улс эрчим хүчний хараат байдалд байгаа гэж хэлэхэд хилсдэхгүй. Нар салхины шинэ станцууд ашиглалтанд орж, дулааны станцуудаа өргөтгөж байгаа ч эрчим хүчний хэрэглээ өдрөөс өдөрт өсөн нэмэгдэж, оргил ачааллын үед Монгол Улс ОХУ-аас импортын цахилгаан авч хэрэглэж байгаа юм. Тиймээс 2019 оныг “Ухаалаг эрчим хүч”-ний жил болгон зарлаж буй талаараа Эрчим хүчний сайд Ц.Даваасүрэн, Эрчим хүчний зохицуулах хорооны дарга А.Тлейхан нар энэ сарын 14-ны өдөр мэдээлэл хийсэн.

Өнгөрсөн онд эрчим хүчний салбар 20 гаруй тэрбум төгрөгийн алдагдалтай ажиллажээ. Энэ алдагдал нь валютын ханш өссөн үед ч импортоор бүтээгдэхүүнээ авдагтай холбоотой аж. 2015 оноос хойш өөрчлөлт ороогүй эрчим хүчний үндсэн тарифыг хөдөлгөх бодлогыг 2019 онд салбар яам нь барьж байгаа. Өнөөдөр хэрэглэгчдэд худалдаж байгаа 1квт.ц цахилгаан эрчим хүчний дундаж үнэ 145 төгрөг байна. Харин нарны цахилгаан станцын үйлдвэрлэсэн 1квт.ц цахилгаан эрчим хүчний үнэ 422, салхиных 230 төгрөг байдаг аж.

Бид энэ талаар Эрчим хүчний зохицуулах хорооноос тодруулахад “Манай эрчим хүчний систем бол бие даасан систем биш. Системийн аюулгүй ажиллагааны зохицуулалтыг ОХУ-тай 220 квт-ын шугамаар холбогдож хийдэг. Үндсэн тариф 2015 оноос хойш өөрчлөгдөөгүй. 2018 онд 20 орчим тэрбум төгрөгийн алдагдалтай гарсан байна. Тиймээс ачааллыг багасгах үүднээс үнийн тарифыг хөдөлгөх бодлоготой байгаа. Цаг нь болохоор энэ талаар мэдээлэл өгнө. Дулаан хоёр дахин, цахилгаан 20-30 хувийн алдагдалтай байгаа. Эхний ээлжид чадлын тарифын асуудал яригдана. Бид нэг квт чадлын цахилгааныг 32 мянган төгрөгөөр аваад 9000 төгрөгөөр аж ахуйн нэгжүүдэд өгч байгаа. Цаашид эрчим хүчний системээ бие даасан, найдвартай ажиллагааг дээшлүүлэх чиглэлээр зарим томоохон асуудлыг шийдэх ёстой. Жишээлбэл: Усан цахилгаан станц. Эрдэнэбүрэнгийн усан цахилгаан станцын хөрөнгө оруулалт шийдэгдсэн. Энэ онд бүтээн байгуулалт эхлэх байх. Эгийн голын усан цахилгаан станц байгаль орчныхоо асуудалтай холбоотойгоор удааширсан. Энэ хийгдвэл манай системийн бие даасан байдал бүрэн хангагдаж эхэлнэ” гэлээ.

Монгол Улсын эрчим хүчний хэрэглээ сүүлийн арван жилд дунджаар тав орчим хувиар өсчээ. Харин 2018 онд огцом нэмэгдэж, эрчим хүчний хэрэглээ өнгөрсөн жилийн мөн үетэй харьцуулахад ес орчим хувийн өсөлттэй байгаа аж. Цахилгаан эрчим хүчний хэрэглээний 80 орчим хувийг дотоодын эх үүсвэрүүдээс хангаж, ОХУ болон БНХАУ-аас импортоор 20 хувийг хангадаг байна. Нийт цахилгаан эрчим хүчний дотоодын үйлдвэрлэлийн 74.3 хувийг дулааны цахилгаан станцуудаар, 3.7 хувийг салхин цахилгаан станцуудаар, 0.9 хувийг усан цахилгаан станцуудаар, 0.6 хувийг нарны цахилгаан станцуудаар, 0.04 хувийг дизель цахилгаан станцуудаар үйлдвэрлэж байгаа аж. Хэдийгээр сүүлийн үед сэргээгдэх эрчим хүчний эх үүсвэр ашиглаж буй хэдий ч оргил ачааллын үед тэр болгон үүрэг гүйцэтгэж чаддаггүй байна. Аль нэг тоноглол доголдох л юм бол ОХУ-аас эрчим хүчээ гэрээгээр авдаг юм.