Loading…

Зуны тэргүүн сарын шинийн 15 буюу Бурхан багшийн их дүйчэн өдөр энэ жилийн хувьд 05 дугаар сарын 26-ны лхагва гарагт тохиож байна.
Эл өдрийг Шагжамуни буддагийн эхээс мэндэлсэн, гэгээрлийн хутгийг олсон, нирваан дүр үзүүлсэн гурван үйл явдал давхацсан өдөр хэмээн хүндэтгэдэг бөгөөд Бурханы шашин дэлгэрсэн улс орнуудад тусгайлан тэмдэглэдэг уламжлалтай. Манай улсад ч олон зуун жил тэмдэглэж ирснээс өнгөрсөн жил нийтээр амрах тэмдэглэлт баярт оруулж сайн үйлсийн өдөр болгосон билээ.

Их дүйчэн өдрийн хамгийн гол утга нь: Энэрэнгүй сайхан сэтгэл үүсгэн эцэг эх, багш, ахан дүүс, байгаль дэлхий гээд өөрийн хүндэтгэдэг, хайрладаг бүхнээ улам илүү болгоон бодож бие, хэл, сэтгэлээ бусад өдрөөс ялгамжтайгаар зориулах билээ.

Бурханы шашинт бидний тухайд бол энэ өдөр Тэгчэн сожон буюу Тэтгэн ариусгахуйн нэг өдрийн сахил хүртэн хамаг амьтны амар амгалангийн төлөө маани тарни тоолж, юмс бүхнийг хайрлан энэрч бясалгаад буянаа хурааж, нүгэл хилэнцээ арилган, бусдын тусыг санан, хилэнцэт хоол унднаас ангид байж мацаглах, эсвэл цагаан зоог барин тэмдэглэх учиртай билээ.

Иймд сүсэгтэн олон та бүхэн өөртөө болон бусдад буян үйлдэж сайхан сэтгэлийн хураар бялхаж, үйлдсэн тэрхүү буян тань ихэд арвижих болтугай хэмээн ерөөл талбия!

Ялгуусан хутагт, Ялгасан гэгээн ДанзинванчүгShuurkhaizar.mn