Өнөөдөр 2017 оны 09 сарын 20, Wednesday
Майкл Жексоны тухай 13 баримт
2016-04-26  

Харин хүмүүсийн тэр бүр мэддэггүй ямар баримтууд байдаг бол? 

  1. Түүнийг арьсаа солиулсан гэдгийг хүн бүр мэднэ. Гэхдээ энэ нь өнгөт арьст байхаасаа ичсэндээ хийсэн үйлдэл биш. Харин тэрбээр арьсны пигментийн алдагдалтай холбоотой витилиго гэдэг өвчтэй байжээ. Энэ өвчнөөр өвчилсөн хүмүүс нарны туяаны нөлөөллөөр арьсан дээр нь цагаан толбо үүсдэг аж.

    ​Майкл Жексоны нүүр хувиргагчийн дурссанаар түүний энэ өвчин 23-24 наснаас нь илэрч эхлэсэн гэнэ. Анхандаа хэдхэн цайвар толбо байсан ч улмаар ихэсч, цайвар өнгийн крем хэрэглэхээс аргагүй болдог байжээ. Витилиго хэмээх өвчин нь нийт хүмүүсийн нэг хувьд л тохиолддог маш ховор, харьцангуй сайн судлагдаж амжаагүй өвчнүүдийн нэг юм. Майкл энэ өвчнөө даван туулахын тулд ихээхэн мөнгө зарцуулсан ч тусыг эс олж, эмч нар түүний арьсыг тэр чигт нь цагаан болгож л чадсан гэдэг. 
     
  2. Майкл Жексоны өөрийнх нь хэлснээр бол амьдралдаа ердөө гурван удаа гоо сайхны хагалгаанд оржээ. Хамартаа хоёр удаа, эрүүндээ нэг удаа мэс засал хийлгэсэн гэнэ. Харин нүүрнийхээ бусад өөрчлөлтүүдийг арьсны өнгө өөрчлөгдсөн, мэдрэлийн ядаргааны улмаас хэт турсантайгаа холбон тайлбарлаж байжээ. 
     
  3. Жексон маш хөдөлмөрч хүн байсан, тиймдээ ч өөрийгөө “ажилтайгаа гэрлэсэн” гэж ярьдаг байжээ. Тэрбээр хамт олноо өглөө хүртэл студи дээрээ байлган ажиллуулж, хөгжим, нот бүрийг шалгадаг байсан гэнэ. 
     
  4. Майклыг нас барахад түүний 13 студийн цомог хэвлэгдээгүй үлджээ. Нас барсных нь дараа тэдгээрээс гурав нь худалдаанд гарсан байна. 
     
  5. Майкл Жексон хөгжмийн зохиолч Чайковскийг шүтэн биширдэг байжээ. “Чайковскийн симфони бүр нь хит болсон шиг” өөрийнх нь дуу бүр хит болоосой гэж хүсч, Чайковский хөгжмийн зохиолчоос үлгэр дууриал авдаг байсан гэнэ. 
     
  6. Майкл Жексон хоёр удаа гэрлэсэн. Эхнийх нь өөрийнх нь шүтээн болсон Элвис Преслигийн охин Лиза Мари, харин хоёр дахь эхнэр нь Дэбби Роув хэмээх сувилагч бүсгүй байсан юм. Лиза Маригаас салсан шалтгаан нь Майкл жирэмснээс хамгаалах эм олсноос болсон гэдэг. Майкл үр удмаа үлдээхийг хүсч байсан ч Мари нууцаар жирэмснээс хамгаалах эм ууж байсныг мэдснийхээ дараа жинхэнэ хэрүүл шуугиан дэгдэж тэд салцгаажээ. Харин хоёр дахь эхнэр нь түүнд хоёр хүүхэд төрүүлж өгөөд, хэдэн сая доллар өвөртлөн, хүүхдүүдээсээ татгалзсан гарын үсэг зураад “арилаад өгсөн” гэдэг. 
     
  7. Майкл хоёр хүү, нэг охинтой. Гэхдээ гурав дахь хүүхдийнх нь ээж нь хэн гэдэг нь тодорхойгүй. 
     
  8. Майклын хүүхдүүдийнх нь загалмайлсан эцэг нь Макалей Калкин. Өнөөх “Гэртээ ганцаараа” киноны сэргэлэн хүү шүү дээ. Харин загалмайлсан эх нь Элизабет Тейлор. 
     
  9. Хэвлэлийнхэн Жексоны талаар байж болох, болохгүй хамгийн хачирхалтай, шуугиан тарьсан мэдээллүүдийг нийтлэдэг байсан. Харин үүнд попын хаан өөрөө л буруутай байсан гэх юм билээ. Нэр алдраа өргөхийн тулд чухамхүү Жексон өөрөө л энэ бүх худал хуурмагийг зохиож, тараадаг байсан гэнэ. Цуу яриа хачирхалтай, хүн итгэмгүй байх тусмаа сайн гэж Жексон үздэг байж
     
  10. Майкл Жексон ням гариг бүр бүжгийн танхимаа цоожлоод өглөөнөөс шөнө болтол бүжгийн хөдөлгөөнөө давтаж, эсвэл шинэ хөдөлгөөнүүд зохион сургуулилт хийдэг байжээ. 
     
  11. Түүний хувьд ажлын долоо хоног мягмар гаригаас эхлэдэг байж. Даваа гариг хамгийн хүнд, уйтгартай өдөр гэж үздэг байсны улмаас ийнхүү мягмар гаригийг ажлын долоо хоногийн эхлэл болгодог байжээ. 
     
  12. Жексоныг дэлхий дахинд попын хаан гэдэг ч барууныхан түүнийг рок од гэж нэрлэх нь бий. Харин 1984 онд ЗХУ-ын эрх баригчид рок хөдөлгөөнд “дайн зарлах” үед Майкл Жексон хориотой рок дуучдын жагсаалтанд орж байжээ. 
     
  13. Майкл Жексон дэлхийн шоу бизнесд хамгийн удаан ажилласан хүн. Тэрбээр энэ салбарт амьдралынхаа 45 жилийг зориулсан юм.

Эх сурвалж: icon.mn

 

« Бусад мэдээ
Шинэ зарууд