Шатахуун импортлогч аж ахуйн нэгжүүд стандартын шаардлага хангаагүй бензин, дизель түлш худалддаг, октан нь заасан хэмжээндээ хүрдэггүй, түгээгүүрээс дутуу шахдаг хэмээн Шатахуун хэрэглэгчдийн холбоо, болон иргэд удаа дараа мэдээлэл хийж, олон нийтийн сүлжээнд баримтат бичлэг нийтэлсэн.

Түүгээр ч зогсохгүй шатахууны үнийг бууруулахын тулд импортлогч компаниудтай тэмцэж, хэдэн өдөр дараалан Төрийн ордныг тойрч, дуут дохиогоо хангинуулан эсэргүүцлээ илэрхийлсэн билээ. Нефтийн бүтээгдэхүүний үнийн өсөлт, чанарын шаардлага хангаагүй түлш, шатахуун зах зээлд борлуулж байгаа хууль бус үйлдлийг цагдаа, мэргэжлийн байгууллагынхан зүгээр хараад суусангүй.

Олон нийтийн сүлжээнд байршуулсан хэд хэдэн мэдээллийн мөрөөр шалгаж, заримд нь хэрэг бүртгэлтийн хэрэг нээн шалгаж эхэлсэн талаар эх сурвалжууд мэдээлэв. Тухайлбал, Багахангай дүүрэгт үйл ажиллагаа явуулдаг “Алтан оршихуй групп” компанийг мэргэжлийн хяналтын байгууллага болон ЦЕГ-ын Эдийн засгийн гэмт хэрэгтэй тэмцэх газрынхан шалгаж эхэлсэн байна.

Тэд өнгөрсөн долоо хоногт дээрх компанийн үйлдвэрт нэгжлэг хийж, үйл ажиллагаа нь хуулийн дагуу явж буй, эсэхийг шалгажээ. Энэ үеэр тухайн компанийн үйлдвэрт дизель түлш гарган авахад ашигладаг химийн хорт, аюулт бодисуудыг зориулалтын бус нөхцөлд, зохих зөвшөөрөлгүй, их хэмжээгээр хадгалж байсныг илрүүлжээ.

Тэдгээр бодисын хадгалалт, хамгаалалт муугаас ойр орчимдоо аюул учруулж болзошгүй байсан. Мэргэжлийн хяналтын байгууллагаас тухайн орчим болон химийн хорт бодисуудаас дээж авч, шинжлүүлэхээр болсны зэрэгцээ агуулахыг нь битүүмжилж, цагдаагийн байгууллага хэргийг нарийвчлан шалгахаар болсон гэдгийг орон нутгийн эх сурвалжууд мэдээлсэн.

Баттай эх сурвалжаас авсан мэдээллээр “Алтан оршихуй групп” компани хүнд даацын машин, механизмд ашиглаж байгаад сольсон тос (ажилласан масло)-ыг дээр дурдсан химийн хорт бодисуудтай урвалд оруулж, “Евро-4” стандартын дизель түлш үйлдвэрлэдэг байсан.

Үүнийгээ Багахангай дахь харьяа шатахуун түгээх станцаараа борлуулж байжээ. Тус компани ашигласан шатах тослох материалыг дахин боловсруулж, дизель түлш үйлдвэрлэх ажлаа 2013 оноос эхлүүлсэн аж.

Дахин боловсруулах үйлдвэрээс гаргаж авсан дизель түлш Монгол Улсын стандартад заасан үзүүлэлтийг хангадаггүй гэж мэргэжлийн хяналтын байгууллага хэлж буй бол орон нутгийн иргэд “Химийн хор, аюултай бодис их хэмжээгээр ашиглаж, байгаль орчин, хүн, мал, амьтанд сөрөг нөлөө учруулж байж болзошгүй” хэмээсэн юм.